Fanm gyòk épi anlò Lanmou

Mèwkrèdi 27 janvyé misyé Didyer Mannette vini bokanté èvé zélèv a lisé-la alantou a Fanm gyòk padavwa sé asi sa nou ka woulé lanné-lasa

An menm balan-la i pwofité pou baylavwa asi dé liv i maké : «Ti mo a lanmou » é « Mwen enmé-w- Ti mo a lanmou 2 ». Dé liv pou ban-nou anvi palé dè lanmou adan lang natirèl an nou. Misyé-lasa sé on makèdpawòl é on résponsab a  Edition Nèg mawon.

Bokantaj a pawòl-lasa té bèl toubòlman. Misyé Mannette rivé fè chak zélèv konprann konsa, yo kapab di bèl biten an kréyòl é lang kréyòl la ni miyèl adan kon tout lang. Sé té lokazyon osi pou fè sé zélèv apwann pa pè palé douvan moun é piplis kijan pou di on poèm an lang kréyòl.

Kon nou ka di  Sé grenn diri ka fè sak diri. Èvè pal-la Misyé Mannette ban-nou la nou ké pé kontinyé vansé èvè sé zélèv-la pou gadé kijan nou pé maké détwa pawòl-fonnkyè, pou tout moun pé vwè avan lékòl-la bout.

Men avan sa, nou ka pawtajé èvè zòt rousanti a Misyé Mannette apré i travay èvè sé zélèv- la. Nou ka ba zòt osi on ti mòso a sa sé zélèv-la fè.

Talcone M.

Cuirassier S.